Ísraelski trygdarmálaráðharrin, Itamar Ben-Gvir, leggur frá sær orsakað av vápnahvíldini í Gaza.
Ben-Gvir hoyrir til tann mest høgravenda partin av stjórnini og er leiðari í Jewish Power flokkinum.
Tveir aðrir ráðharrar, eisini úr flokkinum hjá Ben-Gvir, hava eisini lagt frá sær.
Fráboðanin kom í dag, eftir at vápnahvíldin varð sett at koma í gildi í morgun.
Flokkurin kallar vápnahvíldarsáttmálan fyri eina "kapitulatión til Hamas" og fordømir tað, sum flokkurin kallar "leyslating av fleiri hundrað drápsmonnum".
Ísraelski forsætisráðharrin, Benjamin Netanyahu, hevur framvegis ein smalan meiriluta í ísraelska tjóðartinginum, Knesset.
Longu hósdagin boðaði Ben-Gvir frá, at hann fór at leggja frá sær, um ísraelska stjórnin samtykti eina avtalu.
Hann segði víðari, at flokkur hansara ikki fer at fella stjórnina. Men tað verður heldur ikki ein partur av henni.
- Vit ætla ikki at arbeiða fyri at fella stjórnina, sum tú (Netanyahu, red.) stendur á odda fyri, men í ideologiskum spurningum fara vit at atkvøða í samsvari við okkara sjónarmið og samvitsku, sigur Ben-Gvir, sambært Times of Israel.
Har stendur víðari, at flokkurin fer ikki at samstarva við stjórnina, fyrr enn stríðið móti Hamas er tikið uppaftur.
Vápnahvíldin byrjaði ikki sum ætlað í morgun, og sambært Ísrael var hetta tí, at Hamas ikki útvegaði ein lista yvir gíslarnar, sum skuldu latast leysir fyrsta dagin í vápnahvíldini.
Hetta hevur elvt til, at Ísrael - eftir klokkan 06:30 okkara tíð - hevur framt álop í Gaza, sum hava kostað mannalív.
Men eftir ymiskar fráboðanir hevur Ísrael váttað, at tað hevur fingið ein lista við nøvnum á trimum gíslum, sum skulu latast leysar í dag.
Ísraelski forsætisráðharrin hevur síðani boðað frá, at vápnahvíldin kemur í gildi klokkan 10:15 danska tíð.
Ritzau/Reuters
