Kanska nýggjur landsliðsvenjarin í dag

– Tað verður ein av fyrstu døgum.

Tað er stutta svarið frá Christian Andreasen, formanni í Fótbóltssambandinum, tá vit spyrja hann, nær greitt er, hvør verður nýggjur landsliðsvenjari.

Higartil hevur starvsnevndin havt ein fund, og tey hava fund aftur í dag, sigur Christian Andreasen, sum samstundis váttar, at tað eru 2-3 nøvn, sum tey skulu velja ímillum. Og hann váttar eisini, at føroyskt navn er millum tey 2-3 aktuellu nøvnini.

Tað merkir, at møguleikin fyri eini føroyskari loysn enn er á borðinum, og tann loysnin er Eyðun Klakstein við Atla Gregersen sum hjálparvenjara, sum er upp á tal.

Tað var tann 16. oktober, at Fótbóltssambandið boðaði frá, at avtala varð gjørd við A-landsliðsvenjaran hjá monnum, Håkan Ericson, um at enda samstarvið.

Síðani vóru boð eftir U-21 venjaratoyminum, Eyðuni Klakstein við Atla Gregersen sum hjálparvenjara, at taka sær av teimum báðum dystunum ímóti Armenia í Jerevan 14. november og ímóti Norðurmakedonia 17. november, har teir vunnu tann fyrra og taptu tann seinna dystin.

Landsliðsvenjarar 1988-2024

Jóhan Nielsen og Jógvan Norðbúð stóðu í felag á odda fyri A-landsliðnum, tá Føroyar og Rumenia hittust í HM-undankappingardysti á Svangaskarði tann 8. september í 1993

^{Dagført 19. november 2024}