Norski forsætisráðharrin, Jonas Gahr Støre, er sinnaður at halda fram sum floksformaður í Arbeiðaraflokkinum og sum leiðari í norsku stjórnini.
Tað leggur hann dent á fyri norsku sjónvarpsstøðini NRK.
Boðini koma eftir at fleiri miðlar hava skrivað um orðaskifti innan Arbeiðaraflokkin, sum snýr seg um, hvørt Støre er rætti leiðarin.
– Eg føli ikki, at mítt politiska lív er hótt. Eg eri í politikki í skiftandi tíðum, sigur Jonas Gahr Støre við NRK.
Til fyrispurningin hjá NRK um, hvørt hann vil siga seg úr starvi sum floksformaður og forsætisráðharri, svarar hann:
- Eg kenni meg eggjaðan til uppgávuna. Tað er ein stór og krevjandi uppgáva, serliga tá ófriður er í flokki mínum, og vit hava ringar veljarakanningar. Eg taki hatta í álvara.
Sambært NRK eru tað sløku meiningarkanningarnar, sum geva Arbeiðaraflokkinum niður á 17 prosent av atkvøðunum, sum hava elvt til orðaskiftið um framtíðina hjá Støre.
Tað eru sløk tíggju prosentstig undir valúrslitinum í 2021, sum førdi til, at konservativi Høyre mátti fara úr stjórnarskrivstovunum.
Sambært NRK hava fleiri limir í Arbeiðaraflokkinum sagt, at teir halda, at Jonas Gahr Støre eigur at leggja frá sær sum formaður áðrenn næsta landsfund floksins.
asnn verður hildin í apríl.
Stein Erik Lauvås, sum er limur í Stórtinginum fyri Arbeiðaraflokkin, tosaði mánadagin við Aftenposten um støðuna í flokkinum.
– Vit hava sæð eina gongd gjøgnum tíðina, har tað er afturgongd. Tað er ein sannroynd. Eg havi stóra virðing fyri Jónasi og tí arbeiði, hann hevur gjørt í nógv ár.
– Men hóast alt trúgvi eg, at vit eru har, sum leiðaraskifti er neyðugt, og at Støre leggur frá sær, segði hann við blaðið.
64 ára gamli Jonas Gahr Støre sigur við NRK, at hann lurtar eftir atfinningunum, men at hann vil hjálpa til við at "venda gongdini" í flokkinum og "fara álop".
Næsta val til Stórting verður 8. september 2025.
/Ritzau/
