Ein maður í 20’unum varð týsdagin skotin til deyðis í Södertälje uttan fyri svenska høvuðsstaðnum, Stockholm.
Hann varð funnin álvarsliga særdur klokkan 04:00 í íbúð í Blombacka-kvarterinum og doyði síðani.
Tað upplýsir løgreglan fyri svensku tíðindastovuni TT.
Ein drápskanning er sett í verk.
- Hetta eru vanligu kanningarnar. Vit tosa við fólk í økinum, kanna hvørji myndatól eru har, kanna offrið og royna at finna motiv, sigur talskvinnan hjá løgregluni, Helena Boström Thomas.
Sambært upplýsingunum hjá svenska blaðnum Aftonbladet hevði offrið tilknýti til bandaumhvørvið í Södertälje, men hetta hevur løgreglan ikki váttað.
Løgreglan hevur bara upplýst, at tey kanna, um so skal vera.
Enn er eingin handtikin í málinum.
Sambært upplýsingunum hjá Aftonbladet var ein persónur afturat í íbúðini, har ungi maðurin varð funnin við skotsári.
Harumframt fann løgreglan ein hund, sum varð skotin til deyðis í íbúðini, og eitt útbrent prutl varð funnin í einum skógarøki nærhendis íbúðini.
– Vit kanna, um samband er við prutlið, men tað skal kanningin vísa, sigur Helena Boström Thomas við Aftonbladet.
Nærmastu avvarðandi hjá tí deyða hava fingið boðini.
Skjóttilburðir eru javnan í Svøríki, sum er tað landið í Evropa, har flest morð verða framd við skotvápnum í mun til talið av íbúgvum.
Hetta sæst millum annað í eini greining frá Rockwool Foundation frá 2023.
Sambært Rockwool Foundation er talið av árligum skottilburðum í Svøríki vaksið munandi seinastu áratíggjuni - úr 10 í 2010 til yvir 60 í 2022.
Til samanberingar doyðu 11 fólk av skottilburði í Danmark í 2022.
/ritzau/
