Vápnahvíldin í Gaza millum hernaðarrørsluna Hamas og Ísrael kemur í gildi sunnudagin klokkan 8:30 lokala tíð - 6:30 okkara tíð.
Tað segði ein talsmaður fyri uttanríkisráðið í Qatar á X.
Katar hevur verið meklari í drúgvu samráðingunum um eina vápnahvíldaravtalu millum Hamas og Ísrael.
- Eftir samskipan við partarnar í avtaluni og meklararnar byrjar vápnahvíldin í Gazageiranum sunnudagin 19. januar klokkan 8:30 lokala tíð.
- Vit heita á íbúgvarnar um at taka fyrivarni, vísa størsta varsemi og bíða eftir boðum frá almennum keldum, skrivar talsmaðurin hjá katarska uttanríkisráðnum, Majed al-Ansari, á X.
Avtalan um vápnahvíld og leysgeving av gíslum, sum Hamas hevur í varðveitslu, varð leygarkvøldið endaliga samtykt av ísraelsku stjórnini.
Tað hevði áður verið góðkent av máttmikla trygdarráðnum í Ísrael og av umboðum fyri Hamas.
Avtalan hevur við sær, at fíggindaskapurin í Gaza verður steðgaður fyribils, og at ísraelskar herdeildir taka seg aftur.
Harumframt skal Hamas lata 33 gíslar leysar, sum eru tiknir til fanga í krígsherjaða palestinska økinum.
Hetta skal gerast í fyrsta umfari av vápnahvíldini, sum væntandi fer at vara í seks vikur.
Samstundis fer Ísrael sambært landsins løgmálaráði at leyslata 737 palestinar, sum eru fongslaðir ella á annan hátt varðhaldsfongslaðir í Ísrael.
Hetta er fyrstu ferð í næstan 14 mánaðir, at partarnir eru komnir ásamt um vápnahvíldaravtalu og semju um leysgeving av gíslum.
Hetta hendi í seinasta lagi seinast í november 2023. Tá hevði kríggið í Gaza varað í ein hálvan mánað.
Ísrael fór undir kríggið í Gaza sum svar uppá álopini hjá Hamas á ísraelskar býir, kibbutzir og ein ísraelskan tónleikafestival 7. oktober sama ár.
Tá drap Hamas umleið 1.200 fólk og tók umleið 250 fólk - bæði ísraelar og aðrar tjóðskapar - til fangar.
Sambært ísraelska blaðnum Haaretz eru 98 gíslar eftir í Gaza. Av teimum eru 36 lýst deyð.
Kríggið í Gaza hevur, sambært myndugleikunum í økinum, sum Hamas ræður yvir, kostað fleiri enn 46.000 palestinarum lívið.
/Ritzau/
