Sjúkrarøktarfrøðingar bera tvær nálir - eina frá fakfelagnum og eina frá útbúgvingarstaðnum. Nálirnar frá útbúgvingarstaðnum hava í fleiri enn 100 ár verið tekin um, hvar tú hevur lisið til sjúkrarøktarfrøðing.
Sjúkrarøktarfrøðingar fara til arbeiðis uttan smykkur, sminku og neglalakk fyri at halda reinføri - tá eru nálirnar einasta prýðið, tær bera.
Gamla nálin hjá Sjúkrarøktarfrøðingaskúla Føroya var vorðin óaktuell. Tí ynskti Fróðskaparsetur Føroya at fáa eina nýggja nál, ið greiðari vísti føroyska tilknýtið og føroyska samleikan.
Í hesum sambandi fekk Nudlavirkið uppgávuna at sniðgeva nálina. Fokusbólkasamrøða varð gjørd, har umboð frá ymsum bólkum av sjúkrarøktarfrøðingum søgdu sína hugsan, um hvør vitan og hvørjar kenslur vóru knýttar at nálunum.
Tað var heilt greitt, at kenslurnar vóru sterkar, og at nálirnar veruliga umboða útbúgvingina og tað fakligheit, ið hon stendur fyri. Sjúkrarøktin umboðar bæði nógva umsorgan og stóra fakliga vitan, og tað varð skjótt greitt, at serliga hesi bæði fyltu nógv hjá luttakarunum í fokusbólkinum.
Eitt annað ynski, ið kom greitt fram í fokusbólkinum var, at nálin skuldi vera serføroysk.
Við hesum í huga, og alstórari virðing fyri uppgávuni, fór sniðgevingararbeiðið í gongd. Hugt var at nálum úr nógvum ymiskum londum, áðrenn støða varð tikin til at taka støði í knappinum til føroyska búnan.
Sniðið sameinir tað serføroyska, fakligheit og umsorgan. Hjarta í miðjuni, umfevnt av búmerkinum hjá Setrinum alt við greiðari tilvísing til føroyska búnaknappin.
Sjálva stoypingina av nálini stóð silvursmiðjan hjá Niels L. Arge fyri, og tey hjálptu eisini við at gera síðstu tillagingarnar at fáa sniðið frá teldu yvir á silvur.
##med2##
