Nú vit hava liggjandi kavaveður, hevur Vága kommuna gjørt av at steingja bryggjubrekkuna, so børn, ung og barnsligar sálir kunnu hugna sær við at skreiða og spæla í kavanum.
Brekkan verður grivin á ein hátt, so síðurnar verða so væl uppfyltar sum til ber fyri at tryggja best møguligu trygd.
- Harumframt er gjørdur ein bakki, og dekk eru løgd niðast í brekkuni til tess at fyribyrgja, at nakar kemur út á vegin, tá komið verður oman á bryggjuna.
Soleiðis siga tey í Vága kommunu í dag.
Lagt verður aftrat, at vegurin eftir bryggjuni verður stongdur við brekkuna, so eingin gjøgnumkoyring verður loyvd hetta tíðarskeiðið.
- Tó verður staðiliga mælt til, at bæði børn og vaksin vísa serligan ans, meðan skreitt verður.
Í Vága kommunu siga tey, at frá klokkan 18 í kvøld verður brekkan stongd fyri ferðslu og so leingi, sum umstøðurnar at skreiða her eru góðar.
- Tó mæla vit til, at tað ikki verður skreitt eftir klokkan 21, siga tey og leggja aftrat, at atkoma til bryggjuøkið verður á Giljanesi/ Hillingartanga og í Miðvági.
Tað kann vera kalt at vera úti í kavanum leingi, og tí fer Virkishúsið við Ánna at bjóða kakao og bollar hóskvøldið frá klokkan 18-20.
- Um viðrar fer Hans Ravnsfjall at syngja jólasangir frá klokkan 19, og neyvari kunning kann lesast á heimasíðuni www.vaga.fo
