– Tá øll játtanin til fólkaskúlan fer til lønir og sparast skulu 4,5 milliónir krónur svarar hetta til á leið 8 ársverk.
Tað sigur Barna- og útbúgvingarmálaráðið í svari til fíggjarnevndina hjá Løgtinginum, sum hevur spurt ráðið um, hvørjar avleiðingar sparingarnar fáa á fólkaskúlan.
Ráðið sigur eisini, at enn er eingin endalig støða tikin til, hvørjar tillagingar fara at verða gjørdar, men hesi átøk hava verið umrødd:
• Økingin til flokslærara og leiðslu, ið hevur verið útrullað í tvey ár, og sum var ætlað at halda fram eitt ár afturat, verður steðgað
• Einki nýtt royndar- og menningarvirksemi verður sett í gongd í 2025, men longu givnar
játtanir halda fram
• 10. flokkar verða samlaðir í færri eindir
• Miðfirrað verður lækkað
Fíggjarnevndin spyr eisini, at hvussu stórur partur av tillagingini í rakstrinum av fólkaskúlanum fer av at savna 10. flokkarnar í færri eindir, og hvussu eindirnar verða skipaðar.
– Enn er eingin avgerð tikin um, hvussu eindirnar verða skipaðar, og hvussu nógvar tær skulu verða. Um tað verða 4 eindir: Tórshavn, Klaksvík, Runavík og Suðuroy, so hevði broytingin í hesum skúlaári verið 4 flokkar færri, sigur Barna- og útbúgvingarmálaráðið.
– Av tí at lítlir flokkar ikki fáa fulla tímatillutan eftir verandi skipan, er sparingin ikki tað, sum svarar til 4 flokkar, men á leið 700 tús. kr. í 2025. Helst skal eisini nakað rindast fyri skúlabarnaflutning, um næmingar skulu flytast yvir um kommunumark, sigur Barna- og útbúgvingarmálaráðið.
