Danska Fólkatingið fer undir føroyska og grønlendska útgávu av heimasíðuni hjá Fólkatinginum.
Hesum boðar Fólkatingið frá á heimasíðuni í morgun.
– Við sjósetingini tekur fólkatingið enn eitt stig í arbeiðinum at styrkja atkomuligheitina tvørtur um tey trý málini í danska ríkisfelagsskapinum, stendur í fráboðanini.
Fólkatingið skrivar, at málbólkurin er ríkisborgarar í Grønlandi og Føroyum, umframt grønlendingar og føroyingar, sum búgva í Danmark.
– Endamálið við verkætlanini er at gera upplýsingar um fólkatingið tøkar um allan ríkisfelagsskapin.
– Í arbeiðnum við at menna heimasíðurnar hava viðkomandi myndugleikar í Grønlandi og Føroyum verið uppií fyri at tryggja góðsku á teimum báðum heimasíðunum.
Formansskapurin í danska Fólkatinginum avgjørdi við árslok 2023, at peningur skuldi útvegast til verkætlanina.
Á heimasíðunum eru millum annað upplýsingar um fólkaræðisligu stjórnina og leiklutin hjá fólkatinginum á økinum, arbeiðið hjá Føroyanevndini og Grønlandsnevndini, umframt arbeiðið hjá uttanríkispolitisku nevndini og arktisku sendinevndini.
Í fjør varð samtulking innførd í fólkatinginum, har fólkatingskvinnan Aki-Matilda Høegh-Dam tosaði á grønlendskum, og síðani vórðu orð hennara týdd til danskt av tulki.
Føroyska og grønlendska útgávan av heimasíðuni koma samstundis sum Danmark er í eini uttanríkispolitiskari kreppu, sum eisini fevnir um Grønland.
Nývaldi forsetin í USA, Donald Trump, hevur boðað frá, at hann vil hava amerikanskt ræði á og ognarrættin til Grønland.
Hann hevur eisini sagt, at hann fer at seta revsitoll á danskar vørur.
Donald Trump hevur eisini ført fram, at grønlendingar eru ónøgdir við Danmark og heldur vilja hoyra til USA.
Føroyska útgávan av heimasíðuni hjá Fólkatinginum kann lesast her
/Ritzau/
