- Útbyggingin av kirkjugarðinum á Knúgvum í Vestmanna hevur drigið út, tí eingin arbeiðstakari hevur verið til verkætlanina.
Soleiðis siga tey í Vestmanna kommunu í dag.
Víst verður á, at í november 2023 fekk kommunan tilboð upp á víðkan av kirkjugarðinum áljóðandi 10,3 milliónir krónur, men kostnaðurin varð mettur at vera alt ov høgur.
- Tí valdi bygdarráðið ikki at taka av tilboðnum.
Í januar 2024 fekk kommunan eitt nýtt tilboð áljóðandi 7,2 milliónir krónur, men aftur hesaferð valdi bygdarráðið at bíða, tí eisini hesaferð varð prísurin mettur at verða í hægra lagi.
- Hetta vísti seg at verða ein røtt avgerð, tí í oktober 2024 eydnaðist umsíðir at fáa eitt tilboð frá Articon á 5,9 milliónir krónur, og bygdarráðið tók av.
Á fíggjarætlanini hjá Vestmanna kommunu fyri 2025 eru tríggjar milliónir krónur settar av, so víðkanin av kirkjugarðinum á Knúgvum kann setast í verk.
